Ko‘kaldosh madrasasi Chorsu maydonida, tepalikda joylashgan bo‘lib, hatto undan-da balandroq binolar — Hoji Ahror Vali juma masjidi va yaqinda buzib tashlangan Chorsu mehmonxonasiga yaqin joylashganiga qaramay, savlat to‘kib turibti.

 Ko‘kaldosh 1570 yilda xonning emikdosh (ko‘kaldosh) akasi bo‘lgan hokim Darveshxon tomonidan qurilgan, deb taxmin qilinadi va shuning uchun ham shunday nomlangan. Asrlar davomida bino bir necha marta o‘zgarishlarga uchragan: ayrim qismlari xomg‘isht uchun buzib olingan, keyin qayta tiklangan. 18 asrda u yerda savdogarlar uchun karvonsaroy bo‘lgan.

 1868 va 1886 yillardagi zilzilalar oqibatida bino qattiq zarar ko‘rgan, mahobatli peshtoqi vayron bo‘lib, imorat deyarli bir asr davomida peshtoqsiz turgan. 1950 yillarda inshoot qoldiqlarida yozgi kinoteatr faoliyat ko‘rsatgan.

 Peshtoq o‘tgan asrning1960 yillarida, fasadning yon tomonlaridagi minoralar esa 1970 yillarda qayta tiklangan.

 Hozirda ta'mirlangan Ko‘kaldosh o‘zining asl maqsadiga ko‘ra foydalanilmoqda — madrasada "Ko‘kaldosh" o‘rta maxsus islom bilim yurti joylashgan. Ammo bino hamon sayyohlar uchun eng diqqatga sazovor joylardan biri bo‘lib qolmoqda

Vikipediyadan olingan surat.